Zunft zu Wein- und Herbergsleuten
Fertig luschtig
Jeede Morge ischs wie immer:
s Radio säit s wird immer schlimmer.
S glych lisisch au im Internet
am Beschte isch blibsch grad im Bett.
D Süchi hed eus fescht im Griff
chasch nümm in d Ferie uf em Schiff.
Luegsch zo de Ami übere Däich
no gseesch die sin grad bös im Säich:
s wird im Trump si Biire wäich und wäicher
und Du vor Schiss grad bläich und bläicher
uff d Lengi duäts mi Gsundheit stööre.
Iich pagg mi Bündel, mi Bagaasch
und säg mir sälber: Vorwärts Marsch!
Sisch mir Ärnscht, iich mach nit s Chalb
iich lauf drvoo, ziien uf e Alp.
S Natel duät mi nümmi blooge
s isch in e Chrache aabe gflooge.
Ganz witt ewägg, bi doch nit doof
zieh mi zrugg in Winterschloof.
Uf em Strausakch wär no Platz
für mi aller liebschte Schatz.
Do oobe gits käi Internet
me liggt der ganzi Daag im Bett.
Chasch vo Böösem do nüt ghööre,
Wind und Wätter dien nit stööre.
Scho ändi Jänner, s negschti Joor,
bsuecht mi äin mit graue Hoor:
Iich sell ganz schnell aabe choo
dir siget au no alli doo.
Wäg dr Süchi mies me nümmi blange
Sit Ändi Joor sig si vergange.
S isch in Amerika dr Scheff e Frau
wie z Aesch bigott, do goot das au.
Jo wenns eso wär chönnt me lache
und äinewääg no Fasnacht mache!
.wö (im Okchtoober 2020)
Quelle: www.aetschbaetsch.ch