Zunft zu Wein- und Herbergsleuten

Dr Häxeschnyder vo Aesch

Im Dorf hai mi e Schnyder gha.
Erstuunlich isch, was dä alls cha.
Me het ihm Häxeschnyder gsait.
Er het de Name nit vertrait.

Er het de Äscher Hose gmacht.
Het immer gschafft bis wyt in d Nacht
Au s Zippers hai dä Schnyder bstellt
und ihn ins Schloss uf d Stör agstellt.

Dört isch nur non e  Jumpfere gsi.
Dr Häxeschnyder goot dört hi.
Im Angesteiner Schloss wird gschafft,
wird gsteggt, wird gnait, wird grafft.

Denn wirds dr Herrin ordlig schlächt.
Si bärzt und jommret, s goot nicht rächt.
"Herr Schnyder, s goot mit mir ans Änd.
Ich mach no s letschti Testamänt.

So holet doch dr Meier gschwind,
das ich die rächte Wörter find!"
Er lauft uf Äesch und holt dä Ma,
sodass er alls ufschrybe cha.

"Jo schrybet, Meier, s Testamänt,
es goot mir ganz gschnäll ins Änd.
Dr Wald im Länzbärg, schrybet uuf!
Ich mach jetz bol my letschte Schnuuf.
Dä Wald cha euchi Gmeini ha.
So, hait dr s gschrybe guete Ma?"

Und chuum isch s gschrybe, stirbt die Frau.
Im Testamänt in stoots genau.
Nit Duggiger hai dä Wald becho.
So chas halt amme leider goh;
denn Angestei ghört scho zu Bärn,
und Duggiger die hätte gärn
dä schöni Wald im Länzbgärg gha.
Und tschuld isch nur dr Häxema.
So ghört dä Wald de Äscher Lüt;
und alles Schimpfe nützt gar nüt.

René Glilliéron †, 1985

 

Quelle:  Gilliéron René, In Euser Sprooch z'hinterscht im Birsegg, im Selbstverlag, Pfeffingen 1985